عايز تضيع؟!

.................

جوه الحواري و الشوارع بنتظر

حلمك يا سمره من زمان يوم ينتصر

مسجون .. معلق على المشانق دمعتي

وبقول يا مين بكره يجيب لي سكتي

انسى الساعات و المحتاجات

وأنام يوماتي في شكوتي

.......

يا ابن الاصول

يا بن الكرامة و العبور

ليه لنتظار؟!

دايما تتوه عن سكتي

عايز تضيع؟!

جرب و قول للصمت لا

تلقي بعينيك كل الحياة

إياك تفكر في السكات

أو يوم تفكر في الفتات

جرب و ثور

على ألف سور

مبني بإيدين لجمتها

من عمر فات

عايز تضيع؟!

إياك تقول إنك جسور

أو يوم تقول إنك عنيد

لازم تفوق

لازم تقول إنك شديد

واللحن منك كله نور

يا بن الضمير

إياك تفكر في الضياع

أو تبكي ع الظلم اللي راح

أفرح اوي

و أضحك أوي

و إياك تسيب غيرك يقول إنه القوي.

جرب تفوق...

هتلاقي فوق الألف عين

بتقول يا ريت تفضل بعيد

حاور و إيد

الشعلة من جواك و زيد

كل الطرق الممكنة

جرب تحل المشكله

هتلاقي وقتك ضاع و راح

خلف النواح

وإن الحياة مفروشة ليك متجمله

بس المهم إنك تهم

ترفض تنام وسط اللئام

وتقول دي حاجه هينه

17 فبراير، 2011‏، الساعة 02:11 مساءً‏‏