ضلوعنا
*****
خليك مكشر
إياك تبشر
خليك كده ديما مقاوح
أياك في يوم أبدا تسامح
خليك لئيم.
أوعاك تصير في يوم كريم.
خليك محوط على النسيم
عبي في أزايز ...
و الكل غايب.
أسرق و صفر .
خليك كده منفوش .. معفر .
.~.~.~.
قربت أموت
ولا يوم هفكر في السجود من أجل قوت.
إياك تقول أني عبيط!
أو يوم تقول إني شريك في الميغه ديه
أنا لا ابن سوق و لاوزير
أنا ابن سيد الغفير ..
مشنوق في سقف فقره دايما
و لا قالش يوم الدنيا مايله.
مسنود بعوده المستحي من لقمه ضايعه.
و في إيده وعد مموتوش..
داير يقوله لبنت بايره.
إياك تخش الدايره ديه.
خليك كده مخمور بهمك.
ده العمر لحظة،
و الفرح لفظة في جيب سعادتك.
و أدي دموعنا
إن يوم رجعنا
و طلبنا منك حقها
إكسر ضلوعنا.
